Bzote tude é benvinde na es xpase ofisial d´Asosiasãu de Língua Maternu Kabeverdian – ALMA-KV. É k grande orgulhe y sentide de misãu ke N ta mandá es mensajen li, kome Prezidente de Konselhe Diretive de nos asosiasãu. ALMA-KV naxsê d´un inpulse sívik y koletive de kes k te akreditá ke língua kabeverdian – xpresãu vive de nos identidade – devê ser respeitode, valorizode y promovide pa tudu uze y na tude situasãu. Nos é un asosiasãu independente, demokratik, aberte y pa tude jente. No ta juntá investigador, prufesor, studante, ativista kultural, profisional de txeu ária y tude sidadãu na Kabe Verde y na diáspura, tude na mesm luta: valorizá y promovê nos língua matern – prinsipalmente se ofisialisazãu – y pa no trabaiá na un pulítika linguístik siéntifik, planifikode y juste. ALMA-KV ten kome misãu fazê língua kabeverdiane okupá un lugar ke de-seu: na sistema idukativ, na administrasãu públik, na vida kultural, na siénsia, na kumunikasãu sosial y na teknolojia d´aoje y de futur. No ta defendê multilinguism y un konvivénsia dret ma purtugês y otes língua, alén de promovê direite linguístik kome parte de direite uman. Na site, bosé ta enkontrá informasãu sobre nox prinsipie, strutura, atividades, publikasãu y manera de partisipá. No ta konvidá bosé pa juntá ma nos. Seja kome menbre, pa ser ativista des kauza ô sinplismente kome un sidadãu interesode, bo vos ta kontá. Junte, no podê mudá nox ekolojia linguístik y isdá konxtruí un futur k más inklusãu y justisa linguístik y alinhode k nos realidade.